V Certame de Microrrelatos en Moaña.(7/9/2007)

A Lonxa Literaria de Moaña presenta a V Edición do seu certame de MIcrorrelatos, a calidade literaria non está rifada coa extensión. Os únicos requisitos son escribir nun máximo de 15 liñas de galego normativo un relato que inclúa a palabra "toxo". Os traballos poderanse presentar ata o día 31 de outubro e o fallo do xurado (composto por dous escritores e un membro da Lonxa Literaria) darase a coñecer antes do 15 de novembro. Como cada ano, haberá un único premio cunha dotación de 300 euros, aínda que o xurado resérvase o dereito de poder outorgar ademais dous accésits.
A Lonxa Literaria tamén preparou dúas lecturas dramatizadas, unha actividade nova que se pretende integrar dentro da XX edición dos circuítos de teatro preparados polo Concello de Moaña a mediados deste mesmo mes. Os textos que se utilizarán na dramatización son "Eliane en ardentía" e "Agnus patris", premios Álvaro Cunqueiro 2000 e 2001, respectivamente.
Para esta actividade, a Lonxa Literaria contará coa colaboración de Antón Lama Pereira, un dos fundadores da Revista Galega do Teatro.
Ademais, o 19 de outubro o grupo literario organiza o faladoiro "AZ", de Xesús Fraga, coa que retoman as súas actividades tras o descanso estival. Será no centro cultural de Tirán.